Jæja kannski ég hendi inn hérna einni færslu eða svo fyrst nýja árið er gengið í garð

Ótrúlegt hvað tíminn líður hratt og síðasta ár held ég bara eitt af mínu bestu árum ef ekki bara það besta.

·        Ég byrjaði að stunda jóga af fullum krafti og kynntist þar hópi af nýjum stúlkum sem við allar urðum góðir félagar.

·        Ég ásamt hópi af góðu fólki héldum óvænta afmælisveislu fyrir hana ömmu Pettu þegar hún varð 85 ára.

·        Ég hætti í Tengi og ákvað að gerast nemi og full time mamma

·        Ég eignaðist dásamlega stelpu sem á hug minn allan

·        Ég hélt mína fyrstu skírnarveislu

·        Skrapp til Parísar með Óðni, æðisleg ferð.

·        Fyrstu jólin haldin þar sem við þrjú vorum öll saman í Grindavík ásamt auðvitað liðinu þar

Já ég held að þetta séu svona hápunktar liðins árs fyrir utan auðvitað að mín fyrsta meðganga var aðalmálið, æðislegur tími.

En nú er nýtt ár og skemmtilegir tímar framundan. Óðinn kominn flotta vinnu, ég að klára bóklega nuddnámið, Hjörtfríður árs gömul í sumar, pabbi fimmtugur og verður familían öll á Spáni að fagna því í sumar og vonandi kemst ég í verklega nuddið í haust. Ji hversu spennandi hljómar þetta  Ég get allavega ekki beðið...

Annars er allt ljómandi gott að frétta. Eins og ég sagði er ég komin í skólann og er að læra að setja saman ilmkjarnaolíur við hinum ýmsu kvillum. Bóndinn er strax farinn að njóta góðs af. Við mægður dúllumst hérna bara á daginn með jógavinum okkar þeim Kristíni Erlu og Thelmu Maríu. Við erum auðvitað löngu byrjuð í sundi með skvísuna. Litla sunddrottningin, alveg kafar á fullu og er svo montinn. Kennarinn duglegur að fá hana lánaða til að sýna hinum hversu dugleg hún er og auðvitað rifna ég alltaf úr monti  Síðan er það næst á dagskrá að við erum að fara norður næstu helgi. Ég ælta mér að komst á skíði og er tengdó held búinn að finna snjóþotu handa þeirri litlu. Óðinn er að fara í vinnuferð þannig að við mægður komum til með að vera að heimsækja vini og ættingja þarna fyrir norðan.

En ég verð líklegast ekkert sérstaklega dugleg að skrifa hérna þar sem ég lét bugast og bjó til síðu handa grallaranum mínum en ég skrifa hérna við og við.

Bestu kveðjur Erna Rún

Vá nóvember kominn! Og kuldinn með honum. Snjórinn kom og fór og allt varð brjálað í vetrardekkjunum. Varð vitni að aftanákeyrslu í þessari eins dags hálku. Einhver gutti voða töffari keyrði aftan á heldri konu. Litlir strákar kunna ekki að keyra! Litla skottan mín er eitthvað að stökkbreytast núna. Heldur leiðinleg á næturnar. Hún er farin að taka upp á því að vakna bara á tveggja tíma fresti. Var búin að heyra að þau tækju einhvern vaxtarkipp við þriggja mánaða aldur og var nú búin að sætta mig við það að hún væri bara að stækka en þetta er orðinn ansi langur kippur hjá henni núna. Kannski er ég bara búin að spilla henni og hún farin að ganga upp á lagið að vera tekin upp og fær að drekka þegar henni hentar. Ég bara get ekki sofið í gegnum barnagrátur. Spurning að herða upp hugann og láta sig hafa það! Sé til hvað gerist á næstu dögum. En við erum að fara að byrja í ungbarnasundi núna 10.nóv. Var að skrá dömuna. Hlakka til að sjá hvernig það verður, hvort prinsessan taki þessu með glöðu geði

Æj ég hef nú voða lítið annað að segja, sit bara með kaffibolla númer 3, harðsperur útum allt og ekki að nenna að fara að setja í vél! Hafið það gott í bili.....

Jæja það ætlar ekkert að stytta upp á þessu skeri! Það er búið að rigna ansi mikið sem þýðir að okkar daglegu göngutúrar um götur Kópavogs styttast svo um munar. Ekki nenni ég að labba hundblaut út um allt! Reyndar kann ég alveg ráð við því, bara skella sér inn í Smáralind og rölta þar um, getur alveg tekið smá á en vandamálið er að það yrðu ansi dýrir göngutúrar! Þið skiljið Ég er að nota tækifærið núna á meðan dóttirin sefur, hún er ekki enn farin að vakna af kvöldsvefninum tja eða hún var reyndar að kúra hjá mér en vildi ekki sjá það að fara fram úr um leið og mamman. Þannig að hún er sofandi eins og unglingarnir Haldið þið ekki að ég hafi ekki bara skellt mér á körfuboltaæfingu í gær. Fékk að kíkja á Breiðablik. Ég var búin að vera með hnút í maganum í allan gærdag því ekki er sæl sú minning af síðasta körfuboltaskotinu mín, þið munið kannski en ég hef þá afsökun að ég var ólétt ókey! Allavega kom ég sjálfri mér á óvart, ég var ekkert góð en skítskárri en ég hélt ég yrði. Fyndið hvað snerpan hjá manni er fljót að fara. Hausinn á manninn er kominn í vörn og byrjaður að spila en lappirnar verða eftir á miðjunni, soldið skondið. Þjálfarinn er kannski ekki alveg my cup of tea en örugglega besta skinn. Sérstakar æfingar en það er bara fínt. En þetta þýðir semsagt að ég er með ágætis harðsperur í dag! Æfing aftur í kvöld sem ég veit ekki hvort ég komist á. Bóndinn að vinna til níu í kvöld sem þýðir að ég þurfi pössun, einhver sem býður sig fram til að passa litla varginn minn En það kemur ljós....

Jæja móment sem margir hafa beðið eftir. Að ég setjist niður og skrifi eina færslu eða svo. Meira en mánuður síðan ég skrifaði hérna inn seinast og héld að svo langur tími á milli færslna hafi aldrei liðið. Nú það hefur ótrúlega margt gerst á síðastliðnum mánuði. Ég varð árinu eldri 26.sept Ég skellti mér á ball og fékk mér í aðra tána en ár og aldir eru síðan ég leyfði mér það Skemmti mér konunglega á ballinu en varð nú samt að passa mig því litla skottan mín var sofandi í Staðarhrauninu og hún þarf víst líka að fá að drekka. Ji eins og það er nú langt síðan ég skrifaði síðast þá finn ég ekkert til að skrifa um þó svo ég hafi skrifað að margt hafi gerst á síðastliðnum mánuði ...hmmm Hjörtfríður nálgast nú fjórða mánuðinn sinn og hún bara stækkar og stækkar og þá kannski sérstaklega á þvervegin, en það er bara sætt. Óðinn farinn að vinna fyrir löngu þannig að ég er búin að vera hérna ein með snúllunni síðastliðnar vikur, reyndar er mjög dugleg að hitta hana Kristíni Erlu jógaböddí, við löbbum Kópavog á enda hvern einasta dag með smá viðkomu í bakaríi Styttist í að ég fari út. Óðinn kom mér svo skemmtilega á óvart að hann pantaði ferð fyrir okkur út 30.nóv. Erum við á leið til Parísar hvorki meira né minna, hann á þetta til strákurinn að detta í rómógírinn við og við Þetta verður æði, hlakka mjög til enda orðin meira en ár síðan ég steig út fyrir landsteinanna. Oh jæja ég er farin að tala í hringi, er á öðrum kaffibollanum en dettur samt eiginlega ekkert í hug að skrifa, hvað er þetta með mig..Andinn kemur yfir mig fyrir næstu færslu.....

Jæja allt að verða kolkreisí hérna, allir að heimta blogg frá mér. Oh hvað maður er latur við þetta orðið. Dóttirin að verða 11 vikna, ekkert smá fljótt að líða. Hún er farin að hafa “vit” á sjónvarpinu. Við erum farin að geta plantað henni í hægindastólnum sínum fyrir framan imbann og þar unir hún sér í þó nokkra stund og ekki skiptir það nú miklu máli hvað hún horfir á, bara að sjónvarpið sé á og þá er mín sátt! Annars er bara allt við það sama hérna í Gullsmáranum. Óðinn að verða búinn í fæðingarorlofinu og þá verðum við tvær að dúllast eithvað hérna heima við. Allir velkomnir að kíkja í kaffi.

Annars er búið að klukka mig tvisvar. Skamm skamm Rannveig og Petra Rós. Nú þarf ég að hugsa um tíu tilgangslaus atriði sem ég verð að setja niður hér! Ok við skulum sjá hvað ég finn.......

1. Ég vann tvö páskaegg í leik hjá Tölvulistanum og það kom mynd af mér á heimasíðuna þeirra. Brjálað stolt af því haha
2. Ég á dúkku sem er kínversk og heitir Lilli.
3. Ég er farin að drekka aftur kaffi eins og ég fái borgað fyrir það.
4. Ég er gjörsamlega veik fyrir skóm, smita líklega dótturina af þeirri dellu.
5. Ég kann ekki að fara með málshætti né orðatiltæki. “Margur er smár þótt hann sé knár”
6. Ég er með ofnæmi fyrir Championship Manager!!!!
7. Ég borða bara pylsu með mikilli tómatsósu, helst Vals tómatssósu og nóg af henni!
8. Ég á það til að segja hlutina vitlaust á ensku. Ég var í Penistone og gisti hjá fullorðnu fólki. Fyrstu nóttina var voða mikið þrumuveður og um morguninn spurði konan mig “Did you hear the thunder last night?” Mitt svar var þetta “No I sleep so fast!” Aha ég meinti sko að ég myndi sofa svo fast!
9. Ég get ekki horft á heila bíómynd! Sofna undantekningarlaust eftir fyrstu 30 mínúturnar!
10. Þegar ég var yngri þá seldi ég systir mína hana Berglindi Önnu fyrir 500 kr. Adda frænka keypti hana hahah....

Jæja þá hef ég komið niður tíu atriðum, þetta var bara nokkuð skemmtilegt og vona að þið hafið gaman af...

Ég ætla að klukka Stefaníu Björgu frænku, Gunnhildi jógadrottningu, Gígju uppgjafarbloggara og Ólöf Helgu híhí...

Heyrumst....

Jæja komin tími á smá færslu.

Nýti tímann meðan dóttirin lúrir í fína stólnum sínum, við erum að tala um hann er með nuddi og alles, hver myndi ekki ná að dotta í þannig græju Annars er bara allt gott að frétta af okkur. Foreldrarnir eru farnir að venjast því að kalla Hjörtfríði litlu með nafni, gekk hálf brösulega fyrst þar sem “litlan” var alveg búið að festast við hana! Hún stækkar og stækkar og er orðinn ansi mikill karakter og svei mér þá ef hún ætlar ekki bara að halda í þennan rauða hárlit Ég var alveg viss um að hún myndi missa það hár sem hún fæddist með en nei nei það situr sem fastast... Enda er hún ofsalega mikið krútt svona rauðhærð Við mæðgur skelltum okkur í jóga hitting í síðustu viku. Ég var alltaf í jóga á meðan ég var ólétt og þar kynntist ég fjórum stelpum og við höfum alveg haldið sambandi. Núna var kominn tími á hitting og sýna afkvæmin sín og monta sig aðeins. Í hópnum eru fjórar stelpur og einn strákur! Ég er ekki frá því að allir sem ég vissi að væru óléttir í sumar eignuðust stelpu. Í vinahópi Óðins eru einmitt fjórar dömur og aðeins einn strákur! Merkilegt nokk....

Annars er nú lítið að frétta, allt við það sama bara...Höfum verið duglegar að vera í Grindavík, svo gott að koma í sæluna heim og láta stjana við sig... Mömmu finnst nú ekki leiðinlegt að fá að knúsast og skottast í kringum hana Hjörtfríði sína. Og ekki kvörtum við foreldranir J

Jæja hef þetta ekki lengra í dag, ætla að athuga hvort Óðinn sé með rænu þarna inn í herbergi, held það bíði ein fín kúkableyja handa honum hehe.

Kv Erna Rún

Góðan dag...

Jæja þá er litlan okkar komin með nafn... og hún heitir... Hjörtfríður og er Óðinsdóttir Það var skírnarveisla núna síðasta laugardag heima í Staðarhrauninu sem heppnaðist rosa vel. Hjörtfríður litla var vakin þegar athöfnin átti að byrja en eitthvað fór það illa í vinkonuna þar sem hún svo grét og öskraði alla skírnina, ekkert hægt að tjónka við henni þessar 20 mín sem þetta tekur... Óhætt að segja að hún hafi skap þessi unga dama!

Jæja vildi bara koma með nýjustu fréttir af okkur....

Bið að heilsa í bili.... 

Góðan daginn....

Jæja vonandi hafa allir skemmt sér vel um verslunarmannahelgina...Við litla fjölskyldan skelltum okkur til Akureyrar og vorum þar í góðu yfirlæti afa Árna og ömmu Laufey... Það hringsnérust allir auðvitað í kringum lilluna og mig en Óðinn þurfti aðeins að hafa meira fyrir hlutunum Við mæðgur flugum og var það nú ekki vandamálið.. Litlan bara svaf af sér báðar flugferðirnar, bara eins og hún hefði aldrei gert annað en að fljúga landshorna á milli... Við komum svo heim í gær... Litlan er núna eitthvað agalega pirruð.. Hefur líklega gripið kvef einhvers staðar hérna á leiðinni suður, hún er alveg þrælstífluð og voða rauð og blaut í augunum. Mamman auðvitað kennir voðalega í brjóst um hana þó svo hún viti nú að þetta sé bara eitthvað smá... Hún verður nú vonandi búin að hrista þetta af sér fyrir skírnina en á laugardaginn 11.ágúst fær hún loksins sitt nafn... Þá getur maður hætt þessum uppnefnum og kallað hana bara sínu nafni...En fyrir utan þennan kvefskít í litlunni er hún alveg æði og tekur framförum á hverjum degi, byrjuð að brosa (ekki svona platbros) og hjala þannig að hún er ekki alveg eins mikið baby og manni fannst hérna fyrst.... Jæja ég er búin að tala nóg um hana í bili....Hey hver getur sagt mér hvernig ég set mynd inn í færslu??? Bara hreinlega kann það ekki...

Annars bið ég að heilsa í bili...

Jæja bloggleti í hámarki núna... Héðan er allt gott að frétta. Litla daman dafnar vel og er orðin rúmlega mánaðargömul. Hún er farin að gefa manni bros og svei mér þá ef hún hlær ekki annað slagið, enda á hún ótrúlega fyndna foreldra! Við erum búnar að fara víða við mæðgur...Við gistum í Grindavík og var það nú ekki vandamálið og á morgun er búið að ákveða flug fyrir okkur. Litlan ætlar á Eina með öllu á Akureyri... Ekki seinna vænna að fara að venja hana við útihátíðarnar en við fjölskyldan ætlum að skella okkur norður. Er nú smá farin að kvíða fluginu, aldrei flogið með lítið kríli áður.. En ef hún ákveður að missa stjórn á skapi sínu þá bara skelli ég henni á brjóstið, ótrúlegt hvað það getur læknað gráturinn hjá þessum krílum, gjörsamlega undra snudda... Við verðum þar alveg fram á mánudag í góðu yfirlæti, býst ekki við öðru en það verði stjanað við mann, allavega hana, veit ekki með mig hehe.... Já eins og ég sagði þá er bara allt gott að frétta og get eiginlega ekki bætt neinu við það í bili. Eins og þið hafið nú tekið eftir þá er hún ekki enn búin að fá nafn en það líður að því að maður geti farið að kalla hana eitthvað annað en litluna eða skottuna eða einhver þannig gælunöfn... Læt ykkur vita hvaða nafn hún hlítur ef við foreldranir náum einhvern tíman að ákveða okkur hehe...

Þangað til næst

Kveðja Erna Rún

Jæja þið voruð ekkert farin að hafa áhyggjur af okkur er það???

Það er allt hið besta að frétta héðan. Litlan okkar stækkar og stækkar og er orðin ansi löng, hún alveg sver sig í móðurættina Verður hávaxin eins og mamman... Við höfum það annars rosalega gott. Hún sefur bara á milli þess sem hún drekkur, ljúft líf að vera svona lítill.. Þannig að foreldrarnir eru alveg að ná ágætis lúrum yfir nóttina, maður er samt hálf rænulaus við kúkableyjurnar kl hálf fjögur á næturnar ég neita því ekki en kvarta samt ekki...

Björg frænka ég ætla að bjóða þér sérstaklega í kaffi í Gullsmárann, þýðir ekkert að heimta fleiri myndir af barninu, þú verður bara að sjá það með eigin augum hehe ekki það að við eigum engar myndir af henni, ég er gjörsamlega stjórnlaus á myndavélinni... Það er sífellt verið að tuða í mér að setja upp síðu fyrir litluna en ég er bara ekki að nenna því, vill einhver annar gera það??? Væri nú samt alveg gaman að monta sig aðeins á henni  Ji ég bara tala ekki um annað en rauðhausinn minn allamalla...

Jæja ætla að leggjast á meltuna, vorum að koma úr afmæliskaffi frá pabba, kallinn 49 ára í dag og svei mér þá ef hann ber bara ekki aldurinn vel, meina hann er nú orðinn afi

Jæja þetta voru bara smá aumar fréttir héðan, kannski næsti pistill verði aðeins skárri...

Bið að heilsa úr rigningunni héðan....

Sæl verið þið öll sömul....

Tíminn líður alveg ótrúlega hratt þessa dagana...Litla skottan mín orðin tveggja vikna og maður sér breytingar á henni á hverjum degi. Hún er alltaf að verða mannalegri, en greyið er samt ekki alveg búin að ná tökum á augunum sínum, þau alveg fara í kriss kross og getur maður ekki annað en sprungið úr hlátri, lítill rangeygður rauðhaus sem er flottust. Við foreldrarnir erum að verða búin að vinna vöggubardagann. Litlan búin að sofa þar síðstu vikuna en við þorum ekki alveg að fara að fagna sigri en þetta er nánast komið í höfn, enda mamman talsvert frekari en skottan (allavega ennþá)  En eins og síðast er bara allt gott að frétta af okkur. Við erum farin að fara í göngutúra með litluna enda ekki annað hægt þegar veðrið er svona geggjað. Er þetta ekki bara eitthvað met hvað það eru búnir að vera margir sólardagar í röð??? Enda er fólk sem er í fríi orðið bara Spánarbrúnt eða allavega familían mín, þó það sé nú ekki að marka þau neitt því það er nóg fyrir þau að vita að það spái sól á morgun og þau er strax farin að taka lit! Ég var ekki alveg svo heppin að erfa þau gen frá foreldrum mínum, en hvað um það ég fjárfesti bara í brúnkukremum J Jæja kannski best að nýta tækifærið á meðan litlan sefur og fá sér að borða!

Bið að heilsa ykkur í bili

Hæhæ öll sömul og takk fyrir kveðjurnar allar...

Héðan er allt gott að frétta. Litla daman orðin eins vikna og strax farin að sýna að hún sé sko með skap haha... Fljótt að koma í ljós að þarna sé á ferðinni ákveðin ung dama. En við getum ekki kvartað þar sem litla skottið sefur bara og drekkur og leyfir þreyttum foreldrum að hvílast á næturna með einu skilyrði að hún fái að vera á milli. Annað er bara ekki í boði fyrir okkur... Já ég veit að það er ekki gott að venja á þetta en það er búið að reyna nýja taktík á hverju kvöldi og alltaf lúffum við. Það er lítið sem við getum spilað á móti þegar litlan hvæsir á okkur og skælir, ekki förum við að skæla á hana tilbaka, þannig að þetta verður svona þar til annað kemur á daginn. En annars er hún algjört draumabarn, lítil og rauðhærð.... Fórum í fyrsta göngutúrinn í gær og kíktum á landsmótið sem er hérna nánast í bakgarðinum hjá okkur. Kíktum á körfuboltaleik og frjálsar. Maggi afinn var ekkert smá sáttur við að heyra að litlan væri ekki orðin eins vikna en strax búið að fara með hana á íþróttamót. Ekkert smá sáttur með það hehe.

Ji maður bara missir sig í að tala um hana, enda kannski ekki mikið annað að ræða hjá mér þessa dagana þar sem allur minn tími fer í að sitja og gefa og vera í einhverri brjóstaþoku þar sem ég bara líð áfram í mínum heimi, man ekki neitt og veit ekki neitt... Ótrúlega fyndið hvað maður verður bara í einhverri sápukúlu, spáir ekki í einu né neinu nema "hvað er langt síðan hún pissaði" "Óðinn ropaði hún áðan?" "Hvað ætli sé langt síðan hún kúkaði síðast?" Akkúrat þetta sem er bara í hausnum á manni. Líkaminn passar bara upp á að ekkert annað komist að hjá manni. Þannig sér hann til þess að við konurnar förum í þessa sápukúlu, þessi svokallaða brjóstaþoka, ætli það sé ekki rétt???

Jæja bara svona smá öppdeit af okkur hérna...

Sæl öll sömul og takk fyrir allar kveðjurnar.. Já það er ótrúlegt hvað þetta er fljótt að breytast.. Síðasta færsla bara eiginlega ekkert að gerast en núna er +1 bara komin og eins og sést er þetta algjör prinsessa sem fílar sko að láta stjana við sig... Hún var nú ekki stór en 14 merkur og 50.5 cm.  Þetta er bara smá öppdeit hérna til að leyfa ykkur að fylgjast með. Nú er hún farin að kalla þannig að ég þýt í bili, skrifa fljótt aftur...

Enn og aftur takk fyrir allar kveðjurnar

Litla fjölskyldan í Gullsmáranum  

Góðan dag elskurnar, hérna í Gullsmáranum er bara allt með kyrrum kjörum fyrir þá sem eru að velta því fyrir sér hvort eitthvað sé búið að gerast... En +1 hefur það bara gott þarna svo ég held það sé ekkert á leið neitt á næstunni... Annars er bara allt gott að frétta... Skellti mér sko í tveggja tíma dekur í gær, fótsnyrtingu og litun og plokk...Alveg himneskt og kærkomið enda ætla ég nú að lúkka í öllum herlegheitunum (grín). En við ættum án gríns að hafa einn svona dag í mánuði eða allavega með reglulegu tímabili þar sem við förum og látum hugsa um okkur. Finnst allt of margar konur láta sjálfa sig sitja á hakanum. Geri mér nú alveg grein fyrir því að aðstæður leyfa ekki alltaf eitthvað mega dekur en allavega þá bara dúlla við sig heima hjá sér, fá smá tíma með sjálfri þér.. Held það sé alveg nauðsynlegt í dag því ekki er nú stressið lítið hjá flestum... Allir alltaf að flýta sér í einhverju lífsgæðakapphlaupi. Þannig allir eiga að taka sér smá tíma fyrir sjálfan sig, jafnt karlar sem konur J

Annars er settur dagur núna á sunnudaginn og hefur fjölskyldan verið dugleg að athuga með mig, athuga hvort ekki sé eitthvað að gerast, hvort engir verkir séu komnir en þau fá alltaf sömu svörin “neibb það er bara allt rólegt”... Meina það getur alveg verið sko tvær vikur í viðbót (krossa samt putta um að svo verði ekki). Annars er fullt tungl á laugardaginn og þá gerist oft eitthvað spennandi aha... Jæja æltaði nú bara að henda hérna inn smá fréttum, ætla að skella mér í Elko að kaupa ryksugupoka og svo er það leikurinn í kvöld, Óðinn að fara að spila. Hann þarf að láta einhvern á bekknum hafa símann, hann þorir ekki öðru ef eitthvað skildi nú fara að gerast.. Annars væri ég nú alveg viss um að Árni tengdó myndi bara hlaupa þarna á kantinum með Óðni og öskra inná “Óðinn það er að gerast!!!” “Óli skiptingu” híhí efast um að þið hafið fattað þetta en ég sé þetta fyrir mér híhí...

Þangað til næst bið ég bara að heilsa.....

Hæhæ

Voruð þið nokkuð farin að hafa áhyggjur af mér eða Jæja mikið er notalegt að vera svona í fríi... Sólin loksins farin að skína og sat ég úti í einn og hálfan tíma í gær og náði að brenna! Aldrei verið svona fljót að taka lit, en ég er allavega ekki gegnsæ ennþá... Núna sit ég bara í rólegheitum með minn kaffibolla eftir nánast 10 tíma svefn. Ljósmóðirin mín skilur ekkert í mér, finnst ég vera allt öðruvísi en aðrar þar sem ég hef sloppið við nánast alla leiðindakvilla og get enn sofið vært og lengi, tja ekki kvarta ég yfir þessu hehe 7,9,13..... Við skötuhjú skelltum okkur á tónleika með Jóa og Þórhildi í gær. Fórum að sjá sveitina AIR, ég veit ekki mikið um þessa sveit annað en að hún er frönsk. Fyrir tónleikana hafði ég nú bara heyrt tvö lög með henni en það var nú fyrir tilstilli Óðins, ég gat ekki farið alveg vitneskjulaus á þetta en ég skemmti mér mjög vel með kúluna þarna út í loftið. +1 var auðvitað á fullu ALLAN tíman og lét vel finna fyrir sér. Fólkið fyrir aftan mig hefur örugglega haldið að ég væri með Tourettes syndrome  því ég var alltaf eitthvað að kippast til eins og kjáni, en þá var það bara +1 að sparka svona í rifin. Óðinn sáttur með það “þetta verður sko engin veimiltýta, lætur sko finna fyrir sér” þessir karlmenn, hugsa bara um matsjóið sitt hehe.... Nú svo verð ég að segja ykkur frá Beggu sys.. En hún og mamma eru tja líklegast lentar í London núna.. Litla systir vann semsagt ferð fyrir tvo til London á mánudaginn, einhver leikur sem hún tók þátt í fyrir löngu á Vísir.is og var einn heppinn dreginn út og það var hún. Hún ákvað að taka mömmu með enda lítill umhugsunarfrestur, allt átti að vera ákveðið bara á mánudaginn. En þær eru semsagt að fara á frumsýningu á Die Hard 4 í London. Og ekki nóg með það þá verða þær sóttar á limma á hótelið sitt og farið með þær á rauða dregilinn þar sem ekki ómerkari maður en Bruce Willis verður í eigin persónu! Þvílíkt ævintýri! Ég gæfi mikið fyrir að vera fluga á vegg þegar þær labba þarna og hvað þá ef Brucarinn gefur sig á spjall við þær! Nú svo eftir myndina fara þær í eitthvað eftirpartý þar sem leikarara og ég veit ekki hvað og hvað verða... Þetta verður snilldin ein enda er ég búin að láta Beggu sys lofa mér að koma með eiginhandaráritun fyrir mig (ég er samt engin áðdáandi Bruce neitt sérstaklega, bara fyndið ef hún biður hann um þetta) og mamma ætlði að kyssa hann á kinnina fyrir Óðinn.  Þetta er alveg magnað en þær koma síðan bara heim á morgun, skot túr en ná samt að kíkja á Oxford street, ekki leiðinlegt.... ÉG updeita ykkur svo þegar ferðasagan er komin í hús en ég held ég geti bara ekki setið hérna við’ tölvuna lengur og horft út um gluggan á veðurblíðuna, ætla að setjast aðeins út á svalir ef ég þori því það er allt morandi þar út í köngulóm og köngulóarvefjum, oj bara þeim var ekki boðið að koma með mér í sólbað.... Jæja þangað til næst bið ég bara að heilsa....